Rannsóknasjóður Háskólans á Akureyri auglýsir hér með eftir umsóknum.
Umsóknareyðublað og reglur sjóðsins er að finna á heimasíðu RHA hér.

 

Umsækjendur athugi að hafi þeir sótt um styrk í sjóðinn áður og fengið úthlutað þá þarf framvindu- eða lokaskýrsla að liggja fyrir hjá sjóðstjórn áður en hægt er að afgreiða nýja umsókn.

 

Umsóknir þurfa að berast til RHA – Rannsóknasvið, Borgum v/Norðurslóð fyrir kl. 12 mánudaginn 3. des. n.k. Séu umsóknargögn póstlögð þarf póststimpillinn að vera eigi síðar en 3. des.

 

Stjórn sjóðsins vill vekja athygli á því að síðustu ár hefur borið á því að umsóknir hafa ekki verið nægilega vel unnar og því skal athygli vakin á því að Rannsóknaþjónusta RHA veitir aðstoð við gerð umsókna samkvæmt samningi við yfirstjórn Háskólans og er því umsækjendum bent á að hægt er að leita aðstoðar hjá Rannsóknaþjónustunni.

F.h. Rannsóknasjóðs HA
Guðrún Rósa Þórsteinsdóttir
gudrunth@unak.is

Dagana 11. og 12. október s.l. voru haldnar vinnubúðir um sjávarútvegsmálefni á Hótel Kea. Tvö megin þemu voru í vinnubúðunum, sjálfbærar fiskveiðar (Sustainable Fishery) annars vegar og verðmætasköpun og nýsköpun hins vegar (Value Creation and Innovation). Vinnubúðirnar voru samstarfsverkefni Sintef í Noregi og Viðskipta- og raunvísindadeildar Háskólans á Akureyri. Fyrirlesarar voru frá Danmörku, Noregi og Íslandi og þátttakendur voru um 30 talsins. 

Var þetta í annað sinn sem slíkar vinnubúðir eru haldnar en í fyrra voru þær í Noregi og ákveðið var í lok vinnubúðanna núna að þær skyldu haldnar að ári í Danmörku. 

Norðlenskum mat og matarmenningu gerð skil á sýningunni MATUR-INN 2007 á Akureyri um komandi helgi

► Um 60 sýnendur
► Úrslitakeppni um titilinn „Matreiðslumaður ársins 2007“
► Frumkvöðlaverðlaun félagsins „Matur úr héraði – Local Food“ veitt
► Markaðstorg, borðbúnaðarsýning, matreiðslukeppni þjóðþekktra einstaklinga,
 keppni í samlokugerð, fræðslustofur (workshop) og margt fleira

Um næstu helgi verður sýningin MATURINN 2007 haldin í Verkmenntaskólanum á Akureyri. Fyrir henni stendur félagið Matur úr héraði – Local Food og er sýningunni ætlað að endurspegla fjölbreytni í mat og matarmenningu á Norðurlandi. Sýning undir sama nafni var haldin fyrir tveimur árum en sýnendur nú eru nálega helmingi fleiri og dagskrá ennþá fjölbreyttari. Meðal viðburða á sýningunni er úrslitakeppni Klúbbs matreiðslumeistara um titilinn Matreiðslumaður ársins 2007. Sýningin verður opin kl. 11 -17 á laugardag og sunnudag og er aðgangur ókeypis. Formleg opnun verður kl. 14 á laugardag þegar Einar Kr. Guðfinnsson, sjávarútvegs- og landbúnaðarráðherra, heimsækir sýninguna.

Dagana 11. og 12. október n.k. mun Háskólinn á Akureyri og SINTEF í Noregi standa fyrir lokuðum vinnubúðum (workshop) fyrir norræna fræðimenn um sjávarútvegsmálefni.

 

Tvö megin þemu verða í vinnubúðunum þ.e. sjálfbærar fiskveiðar (Sustainable Fishery) annars vegar og verðmætasköpun og nýsköpun hins vegar (Value Creation and Innovation). Þátttakendur í vinnubúðunum koma frá Norðurlöndunum og áætlað er að þeir verði um 25-40 talsins. Vinnubúðir sem þessar eru hugsaðar sem vettvangur aðila sem vinna að rannsóknum á sviði sjávarútvegs og hagsmunaaðila þeirra til að efla tengsl og samstarf. Ljóst er að slíkar vinnubúðir eru mikill fengur fyrir þá aðila sem koma að þeim. Slíkt mun styrkja tengslanet íslenskra fræðimanna á þessu sviði og styrkja rannsóknir tengdar sjávarútvegi.

 

Dagskrá ráðstefnu

RHA tók þátt í Vísindavöku Rannís - stefnumóti við vísindamenn í Listasafni Reykjavíkur föstudaginn 28. september. Áhersla var lögð á að sýna þá faglegu breidd sem verkefni RHA spanna.  Voru kynnt 3 veggspjöld í þeim tilgangi og glærukynning sem tengist verkefnum stofnunarinnar.  Að mati þeirra fjögurra starfsmanna sem voru fulltrúar RHA tókst mjög vel til og var þátttaka almennings mikil.

Út er komin skýrslan ,,Umskipunarhöfn á Íslandi fyrir Íshafssiglingar, fjórir mögulegir staðir" sem var unnin á RHA.
Nokkuð hefur verið rætt um opnun Íshafsins fyrir siglingar og hvaða áhrif það muni hafa fyrir Ísland.  Utanríkisráðuneytið gaf til að mynda út skýrsluna ,,Fyrir stafni haf" um málefnið. 

 

Einnig var haldin vegleg ráðstefna á Íslandi um málið í mars árið 2007.  Finna má alla fyrirlestrana á vefslóðinni
http://arcticportal.org/webcast/recorded-webcasting/archived-webcasts/conferences/breaking-the-ice

 

Í þessari skýrslu er farið lengra í pælingum um umskipunarhöfn á Íslandi fyrir Íshafssiglingar.  Fjórir staðir eru skoðaðir í þeim efnum:  Eyjafjörður, Reyðarfjörður, Hvalfjörður og Dýrafjörður.  Ekki var ætlunin að kveða upp dóm hver staðanna væri bestur heldur reyna að varpa ljósi á kosti þeirra og galla.

 

Jón Þorvaldur Heiðarsson sérfræðingur á RHA vann skýrsluna.  Rannsóknin var styrkt af utanríkisráðuneytinu.

Lokaráðstefna verkefnisins Social Return verður haldin á Hótel Loftleiðum Reykjavík, föstudaginn 28. september. Sjá frétt um verkefnið hér á vef RHA 23. ágúst sl.

Dagskrá ráðstefnunnar er hér. Þátttaka er ókeypis en skráning fer fram í tölvupósti til soffia@simey.is

Föstudaginn 7. september verður kynning á Rannsóknasjóði og Tækjasjóði Rannís hér hjá Háskólanum á Akureyri.

Kynningarfundurinn fer fram í stofu R311 á Borgum kl. 13.15-15.15. Nánari upplýsingar um fundinn má nálgast hér.

Sérfræðingar í rannsóknum og akademískir starfsmenn eru hvattir til að skrá sig á fundinn hjá rannis@rannis.is

Björk Sigurgeirsdóttir hefur látið af störfum hjá RHA til að taka við starfi verkefnisstjóra Vaxtarsamnings Austurlands á Egilsstöðum. Við þökkum Björk ánægjulegt samstarf og óskum henni velfarnaðar í nýju starfi.

 

Tryggvi Hallgrímsson félagsfræðingur hóf störf hjá RHA í júli síðastliðnum og mun starfa hjá RHA við ýmis verkefni tengd sinni sérgrein, samhliða kennslu við Félagsvísinda og lagadeild HA.  Netfang Tryggva er trhall@unak.is og símanúmer. 460-8916

 

Lára Guðmundsdóttir, B.S. í umhverfisfræði, hóf störf hjá RHA 1. september. Hún mun starfa að ýmsum verkefnum innan RHA, m.a. aðstoð við rannsóknaverkefni og ýmis önnur sérverkefni. Netfang Láru er laragudmunds@unak.is og símanúmer. 460-8908

 

Þórunn Guðlaugsdóttir, B.S. í líftækni, hóf störf hjá RHA 1. september síðastliðinn. Mun hún starfa að ýmsum verkefnum sem tengjast matvælum meðal annars með tilliti til neyslu og hollustu þeirra.  Netfang Þórunnar er thorunng@unak.is og símanúmer. 460-8917

 

Við bjóðum þau Tryggva, Láru og Þórunni velkomin til starfa hjá RHA.

Rannsóknar- og þróunarmiðstöð háskólans á Akureyri, ásamt Ferðamálasetri Íslands, embætti veiðimálastjóra og félags hreindýraleiðsögumanna vinnur að samnorrænu verkefni um þróun skotveiðitengdrar ferðaþjónustu undir formerkjum efnahagslegrar, félagslegrar og umhverfislegrar sjálfbærni. Verkefnið er styrkt af NPP (e. Northern Periphery Programme) og er forvinnu lokið.  Komin er út skýrsla sem tekur saman stöðu skotveiðitengdrar ferðaþjónustu í Svíþjóð, Finnlandi, Íslandi og Kanada.  

Skýrsluna má nálgast hér