Rannsóknaþing Norðursins (NRF) hefur birt á
heimasíðu sinni, www.nrf.is, ritgerðir frá fimmta rannsóknaþingi félagsins sem var haldið í Anchorage í
Alaska, í september á síðastliðnu ári. Alls eru birtar 44 greinar sem tengdust málefnum fimmta Rannsóknaþings Norðursins og eru
þær skrifaðar af þátttakendum rannsóknaþingsins og sérfræðingum á sviði norðurslóðamálefna.
Allskonar kynjaverjur heimsóttu RHA á öskudaginn, börnin glöddu starfsfólkið með söng og þáðu harðfisk að launum. Það er alltaf gaman að fá börnin í heimsókn á þessum degi og sjá hversu mikið þau leggja í búninga og söng. Greinilegt var að tíðarandinn í þjóðfélaginu hefur áhrif á börnin því sumir textanna voru skemmtilega beittir og fjölluðu um verðbréfahrun, útrásarvíkinga, Davíð, Jón Ásgeir, Björgólf og fleira í þeim dúr. Gamli Nói fór t.d. illa út úr verðbréfaviðskiptum og tapaði öllu sínu.
Hjördís Sigursteinsdóttir og Eyrún Jenný Bjarnadóttir kynntu North Hunt
verkefnið á Fræðaþingi landbúnaðarins á Hótel Sögu s.l. föstudag. Kynningin var á málstofu C –
Nýsköpun í dreifbýli – smáframleiðsla matvæla. Í kynningunni fjölluðu þær um skotveiðar á
Íslandi og hvernig þær hafa þróast hérlendis á síðustu árum ásamt því að fjalla um tengingu frekari
þróunar starfsgreinarinnar við hugmyndafræði sjálfbærrar þróunar. Einnig kynntu þær North Hunt verkefnið, um
hvað það snýst, hverjir taka þátt og hvað á að gera.
Atvinnuleysi eykst nú hröðum skrefum á Íslandi. Aðilar vinnumarkaðarins hafa kallað eftir því að hið opinbera fari í mannaflsfrekar framkvæmdir. En hvaða framkvæmdir eru mannaflsfrekar? Hvaða framkvæmdir í samgöngum eru mannaflsfrekastar? Er það vegagerð, brúargerð eða jarðgangagerð svo helstu flokkar séu nefndir? Í apríl 2008 kom út skýrsla sem RHA vann fyrir Vegagerðina þar sem þetta var m.a. skoðað. Það kom í ljós að mannaflsfrekustu framkvæmdir í vegagerð eru brúargerð, í öðru lagi jarðgangagerð og þar á eftir kom hefðbundin vegagerð. Ef yfirvöld vilja grípa til þess ráðs að fara í mannaflsfrekar framkvæmdir í samgöngum ættu þau því að horfa fyrst og fremst á verk í brúargerð.
Kynningarfundinum Rannsóknir og nýsköpun - sóknarfæri til framfara er nú nýlega lokið í anddyri Borga v/Norðurslóð. Erindi fluttu aðilar frá RANNÍS, Impru og AFE (Atvinnuþróunarfélag Eyjafjarðar) og fundarstjóri var Hans Kristján Guðmundsson, deildarforseti viðskipta- og raunvísindadeildar Háskólans á Akureyri.